🚌 مكتبة مصر العامة المتنقلة "مصر تقرأ" من خلال الزيارات الثابتة اللي بتقوم بيها على مدار الشهر وفرت 17 فرع لمكتبة مصر العامة..
تعالوا نتعرف إزاي الكلام ده بيحصل :
أولاً : ليه تشترك لنفسك ولأطفالك في مكتبة مصر العامة المتنقلة؟
ببساطة لإنها هترجع القراءة لبيتك وهتخليها عادة من عاداتك انت وأسرتك.. نرجع ثاني مجتمع قاريء وواعي.. ونخلق جيل مختلف متوازن بين استخدامه للتكنولوجيا وبين حفاظه على عادة القراءة.. وده من خلال تنظيم زيارة شهرية ثابتة لعدد (17) موقع خدمة علشان مواقع الخدمة دي تكون بمثابة فروع ثابتة لمكتبة مصر العامة.

ثانياً : إزاي بنشترك في المكتبة المتنقلة "مصر تقرأ" ؟
خلينا الأول نقولكم أسعار الاشتراك السنوي في المكتبة المتنقلة واللي تعتبر رمزية وبتتيح الاستخدام الكامل للمكتبة المتنقلة ولكل فروع المكتبة في القاهرة ( الدقي – الزيتون – الزاوية الحمراء) : الإشتراك في المكتبة بيبدأ من 3 سنين وقيمته سنوياً للأطفال تحت 16 سنة 25ج .. فوق 16 سنة 35ج .. فوق 30 سنة 45ج .. فوق 60 سنة 25ج.. وفي كمان إشتراك عائلي لو الأب والأم وأطفالهم إشتركوا  ليهم تخفيض عائلي 25٪ على قيمة إشتراك كل فرد في العيلة..
الكلام ده في السنة وعلشان كدة يعتبر اشتراك رمزي..

إجراءات الاشتراك الفوري في مكتبة مصر العامة المتنقلة "مصر تقرأ"  سهلة وسريعة من خلال فريق عمل المكتبة المتنقلة الي هيساعدوك تملا استمارة العضوية في المكتبة وتسدد قيمة الاشتراك السنوي وبتحصل على كل الخدمات بعديها مباشرة في أقل من 5 دقائق من خلال كارت العضوية المؤقت اللي بيتحلك استخدامه مباشرة للحصول على كل الخدمات في نفس الزيارة اللي اشتركت فيها واللي بتكون الزيارة الأولى ليك والكارت بيكون مسجل عليه رقم واتساب مخصص لاستقبال الصور والأوراق المطلوبة لاستكمال الاجراءات بتبعتها بعد ما بتروح واللي بتمكن فريق عمل المكتبة المتنقلة من طباعة كارنيه العضوية السنوي علشان تستلمه في الزيارة الشهرية الثانية ليك واللي بيفضل معاك لمدة سنة كاملة..